العشق والدم ( الجزء السادس عشر )

-١٦-

جلست حنان مع ابوها وامها في فيلا التجمع أمام حمام السباحة وضعت الخادمة اكواب الشاي واطباق الكيك أمامهم ثم انصرفت ، التفت عزت الي ابنته ثم قال : اديني عملتلك كل اللي انت عايزاه وشغلت حامد محاسب عندي في الشركة .

نطقت بحنان بود : انا عارفة يا بابا اني دخلتك في قصص ومشاكل انتي في غينه عنها .

ربت عزت علي يدها وقال : مش مهم اي حاجه كل اللي يهمني انت يا بنتي لازم تخلصي من الكلب ده بأي طريقة .

هزت حنان رأسها بالإيجاب وقالت بنبرة حادة : وغلاوتك عندي يا بابا لوقعه في شر اعماله .

نطقت ناهد بتفاؤل : غمة وهتنزاح ان شاء الله ، معلش يا حنان محدش بيتعلم ببلاش

علقت حنان على كلام امها فقالت : عندك حق يا ماما محدش بيتعلم ببلاش .

اتفقا الثلاثة معا ان ينتقموا من حامد أشد انتقام ليكون عبره لمن يعتبر .

 

العشق والدم ( الجزء الخامس عشر )

-١٥-

وقف حامد أمام شركة عزت القماش ينظر لها بتباهي وكأنه صاحب الشركة ثم حدث نفسة قائلا : وحياة امك يا قماش لرجعك شحات زي ما ابتديت .

صعد حامد درج السلم بخطوات ثابته حتي وصل الي مكتب السكرتيرة ثم قال بثقه : عندي معاد مع عزت باشا .

تفحصته السكرتيرة بقلق خاصة انها رأته المره السابقة عندما علا صوته على عزت القماش وهدده فسألته بقلق : انت متأكد انك واخد معاد مع مستر عزت ؟

ابتسم حامد بسماجة ثم قال لها بلهجه امر : قوليله حامد الوكيل .

التقطت السكرتيرة الهاتف بيد مرتعشة واتصلت بعزت القماش واخبرته ثم التفتت إلى حامد وقالت له : مستر عزت منتظرك .

طرق حامد على الباب طرقة خفيفة ثم دخل دون أن يتلقي رد منه ، مد حامد يده وصافح عزت ثم قال له : شرف ليه اني اشتغل مع سعادتك .

نظر له عزت القماش بتعالي ثم قال : انا هبدأ معاك صفحه جديده وهشوف اذا كنت تستاهل اللي حنان عملته علشانك ولا متستهلش .

ثم اردف بلهجة تهديد : بس خلي بالك لو طلعت متستهلش هدفعك التمن غالي اوي وهندمك على اليوم اللي شوفت فيه بنتي حنان .

نظر لي حامد بتحدي ثم سأله : طب ولو طلعت استاهل حنان هتعمل معايا ايه ؟

ضحك عزت بعلو صوته ثم قال باستهزاء : عشم ابليس في الجنه .

ثم أشار بيده بأن يذهب ليستلم عنده ، خرج حامد من مكتبة وهو قاسم مائة يمين بأنه سينتقم منه أشد انتقام .

العشق والدم ( الجزء الرابع عشر )

-١٤-

في اليوم التالي استيقظ حامد على صوت زوجته حنان حيث هتفت قائله : اصحي يا حامد علشان تروح الشغل .

فقفز حامد من مكانة ثم سألها باندهاش : شغل ايه هو انا بشتغل اساسا ؟

ضحكت حنان ثم قالت برقة : انت النهارده هتنزل الشغل مع بابا .

لم يستوعب حامد ما قالته حنان فسألها : بابا مين ؟

فأجبته بهدوء : ما انا نسيت اقولك اني كلمت بابا بالليل علشان تنزل الشغل معاه وهو وافق علي طول .

شك حامد في كلام حنان فكيف يوافق عزت القماش ان يعينه موظف عنده وحدثت بينهما مشاجرة كبيرة منذ ايام خلافا عن ذلك فإنه افصحي أمامه عن نوايا في الاستيلاء على أمواله ولهذا قال لزوجته بضيق : بس انا مش هشتغل عند ابوكي يا حنان .

نطقت حنان معاتبة : احنا ظروفنا صعبة يا حامد ومحتاجين فلوس كتير ، مش انت كنت دايما بتقولي كلمي بابا علشان يساعدنا واهو بابا وافق يشغلك معاه ويكبرك علشان تليق تبقى جوز بنته .

زفر حامد بضيق ثم قال : هو القماش لازم يشقني علشان يساعدنا ، اب بيساعد بنته دخلي انا ايه !

نطقت حنان بحده : بابا مش فتحها تكية عايز فلوس يبقى لازم تشتغل عنده ده غير أنه هيكبرك ويمسكك شركاته .

في النهاية وافق حامد على يعمل موظفا في شركة القماش فقد استطاعت حنان ان تستغل نقطة ضعفه الا وهي الطمع .

العشق والدم ( الجزء الثالث عشر )

-١٣-

عادت حنان إلى حامد ولم تفتح معه الحوار وكأنها لا تعرف شيئا عن خداعة لها ، دخلت حنان غرفتها اغلقت عليها بابها وبكت بصوت مكتوم حتي لا يلاحظ حامد او فردوس شيئا وبعد نصف ساعة خرجت من الحجرة امرأة اخري مرسوم على وجها ابتسامة واسعة عينها تنطق بالحب والتفاؤل ولكن ما لا يراه أحد أن بداخلها نار مشتعلة ستحرق الجميع انه الجحيم بعينه ، تعجب حامد من حالة السعادة التي تعيشها فسألها : انت النهارده وشك منور غير كل يوم ، ايه اللي حصل ؟

فأجبته حنان برقة : حد يجوزك يا حامد وميبقاش مبسوط .

ضحك حامد ثم قال : لما مزاجك بيبقى رايق بتبقى حاجة تانية .

فردت حنان مجاملة : مزاجي رايق طول ما انت جنبي .

استغل حامد هذه اللحظة السعيدة والتي لا تأتي كثيرا ثم قال : علشان نفضل سعدا كده على طول لازم تكسبي ابوكي عزت القماش احنا الايام دي محتاجينه يقف جنبنا ولا عجبك الفقر اللي احنا فيه ؟

ضحكت حنان ثم قالت بثقه : متقلقش يا حامد ابويا مش هيسبني في الفقر ده اكيد هيقف جنبي .

اطمئن حامد ان الامور تسير على ما يرام وظن وان القماش رضخ اخيرا وسيساعد حنان ويقف بجوارها في تلك الأزمة ، شرد حامد في أموال القماش التي سيستولي عليها عن طريق ابنته حنان .

العشق والدم ( الجزء الثاني عشر )

-١٢-

اتصل عزت القماش هاتفيا بأبنته حنان وطلب منها المجيء إلى الفيلا وحينما أتت الفيلا لم يقابلها بفتور مثل اول مره بالعكس كان متعاطفا معها بشده فهي في النهاية ابنته الوحيدة حيث قال لها بهدوء : اوعي تفتكري اني مبحبكيش يا حنان ده انتي بنتي الوحيدة بس اللي مزعلني منك انك بيعتي الدنيا كلها علشان عيل ميستهلش .

نطقت حنان مدافعه عن زوجها وقالت : حامد كويس اوي يا بابا بس انت بتحكم علية من غير ما تعرفة .

ضحك عزت بعلو صوته ثم قال باستهزاء : حامد جوزك اللي انتي شيفاه ملاك نازل من السما جالي الشركة النهارده .

فسألته حنان باستغراب : وحامد يجيلك الشركة ليه ؟

التقط عزت هاتفه المحمول وقام بتشغيل مقطع تسجيل صوتي للحوار الذي دار بينهما فحينما علم عزت بنوايا حامد الخبيثة سجل مقطع صوتي للحوار الذي دار بينهما ، انصدمت حنان وهي تسمع المقطع الصوتي انهمرت الدموع على وجنتيها فلم تكن تتخيل أن يكون حامد بهذا السوء ولكنها الان أيقنت انها أحبت شيطان لا يستحق أن تفتح له باب قلبها وتعطيه مفتاحه .

ربتت ناهد على كتف ابنتها ثم قالت : انتي أختارتي غلط وانا وابوكي كنا متوقعين أن ده يحصل .

صمت عزت قليلا حتي هدأت حنان ثم قال : انا معنديش مشكلة اني اديله الفلوس اللي هو عايزها ويطلقك .

ثم ارتشف من كوب الماء البارد الموجود أمامه وسألها : يرضيكي يا حنان عيل صايع زي ده يضحك علينا وياخد فلوسنا ؟

فهزت حنان رأسها بالرفض ثم قالت بنبرة كراهية : وغلاوتكم عندي لدفعه التمن غالي اوي ، هوقعه في شر اعماله .

فنطق عزت باعجاب : انتي كده بنتي حبيبتي اللي اتشرف وافتخر بيها ولو انتي احتاجتي اي حاجه في الدنيا اتصل بيه ومتردديش وانا هنفذها على طول .

 انصرفت حنان من فيلا القماش وقد قسمت أن تأخذ ثائرها من حامد سيدفع ثمن خداعة وكذبه عليها سيدفع ثمن طمعه وحبة للمال الذي وصل الي حد العبادة سيدفع الثمن غاليا وقد يكون الثمن حياته نفسها .

العشق والدم( الجزء الحادي عشر )

-١١-

في اليوم التالي وقف حامد أمام شركة عزت القماش حيث انها تعتبر الإدارة لمجموعة كبيرة من المطاعم تتخطي الخمسين فرعا ، دخل حامد الشركة بخطوات مضطربة وقف أمام مكتب السكرتيرة ثم سألها : عزت باشا موجود ؟

فردت السكرتيرة بهدوء : اه يا فندم موجود .

ثم سألته : نقوله مين ؟

فتنحنح حامد قليلا ثم قال بتلعثم : حامد جوز بنته .

التقطت السكرتيرة تليفون الشركة وتحدثت مع عزت القماش بصوت منخفض لم يستطع حامد سماعة وبعد أن أنهيت المكالمة التفتت اليه ثم قالت بنبرة عملية : اتفضل يا فندم مستر عزت في انتظارك .

سار حامد بخطوات مضطربة حتي وصل إلى مكتب القماش طرق على الباب بهدوء ودخل بعدما اذن له القماش بالدخول ، تفاجأ حامد برجل عجوز يقبع خلف مكتبة تخطي الستين بقليل ظهرة محني قليلا هناك رعشة خفيفة في يده ، يرتدي نظارة عدساتها سميكة مما يدل على أن نظره ضعيف ويكاد ان يكون معدوما .

أشار له عزت بالجلوس ثم سأله باستخفاف : انت بقى حامد اللي حنان بنتي باعت الدنيا علشانك ؟

فهز حامد رأسه بالإيجاب ثم قال بثقة : القلب وما يريد يا باشا .

اعتدل عزت في جلسته ثم سأله بجدية : عايز ايه يا حامد ؟

فرد حامد بهدوء : بيزنس يا باشا المكسب فيه مضمون .

ضحك عزت ثم سأله باستهزاء : وانت بتفهم في البزنس ؟

تخطي عزت سؤاله اللزج ثم قال بنبرة واضحة : انا عارف انك معترض على جوازي من حنان بنتك ومستعد تعمل اي حاجه في الدنيا علشان اطلقها وترجعلك

هز عزت رأسه متفهما مقصده ثم سأله بهدوء : عايز كام يا حامد علشان تطلقها ؟

فرد حامد بنبره جاده : مليون جنية يا باشا .

ضحك عزت ضحك هستري فسأله حامد بضيق : ايه اللي يضحك في اللي انا بقولة يا عزت باشا ؟

فرد عزت موبخا : حنان باعت الدنيا علشان تشتريك وانت دلوقتي بتبعها علشان شوية فلوس .

زفر حامد بضيق ثم قال : محدش بيتعلم ببلاش المهم مطلعش من الحوار ده الا وانا كسبان .

ارتشف عزت من كوب الماء البارد الموجود أمامه ثم سأل حامد بخبث : طب لو انا مردتش ادفع المليون هتعمل ايه ؟

فأجابه حامد بمنتهي البجاحه : مش هطلقها .

ابتسم عزت ثم قال ببرود : محدش قالك طلقها هي اختارت يبقى تتحمل نتيجة غلطها .

فسأله حامد بنبرة حادة : يعني انت مش ناوي تدفع ؟

فرد عزت بنبرة واضحة : عزت القماش مش راجل اهبل علشان يوزع فلوسه على شوية نصابين ، انت اتجوزت حنان علشان تقلبني في كام مليون ولما معرفتش جاي تساومني بس انا بقولك اهو بكل صراحة البسها وبالشفا مقدما .

ثم ضحك عزت القماش ضحك هستري مما زاد من استفزاز حامد حيث صرخ في وجهه هاتفا : هتدفع التمن غالي اوي يا قماش .

ثم انصرف من شركة القماش قاسما بأن ينتقم منه هو وابنته أشد انتقام قائلا لنفسه : حامد مش هيخرج من اللعبة دي الا وهو كسبان .

العشق والدم ( الجزء العاشر )

-١٠-

جلس حامد على مائدة الطعام وبجواره حنان زوجته وفردوس امه ، حنان شاردة ؛ حزينة لم تقرب الطعام فسألتها فردوس باستهزاء : مبتكليش ليه ولا اكلي مش عجبك ؟

فردت حنان بنبرة حزينة : مليش نفس .

فنطقت فردوس باقتضاب : براحتك .

التفت حامد لزوجته ثم سألها : مالك يا حبيبتي ؟

فردت حنان بضيق : مخنوقة اوي .

فأقترب منها حامد وقال هامسا : نخش اودتنا ونكلم براحتنا .

اخذ حامد حنان من يدها ودخلا الغرفة واغلقا الباب خلفهما حتي لا تتصنت عليهما فردوس ، تفحص حامد زوجته بخبث ثم سألها : ايه اللي حصل مخليكي مبوذه بالشكل ده .

فأجابته حنان بنبره حادة : انا زهقت من العيشة دي .

ابتسم حامد ثم قال بخبث : انتي الوحيدة اللي في ايدك تغيرها .

زفرت حنان بضيق ثم صرخت في وجهه هاتفه : قصدك اترجي ابويا انه يصرف علينا واقوله معلش اصل جوزي مبيشتغلش فهنعيش علاوة عليك .

اشتاط غيظ حامد فانفجر فيها قائلا : اي واحده مكانك هتعمل كده ، انتي اللي راضية بالفقر وابوكي عايش في قصر ومعاه ملايين متلتله .

ردت حنان بنبرة صادقة : انا راضية بالفقر علشان حبيتك ، بس يا خسارة طلعت غلطانة لأنك متستهلش .

أشعل حامد سيجارة زفر دخانها بضيق ثم قال : مش عيب ان الواحد يكون طموح ويدور لنفسه على عيشه افضل .

فعلقت حنان قائلة : تبقى طموح بشغلك وفلوسك مش بفلوس ابويا .

نظر لها حامد بشزر ثم تركها وخرج من الحجرة ثم من البيت اما حنان فبكيت بحرقة فقد انصدمت في زوجها وحبها الوحيد حامد .

العشق والدم ( الجزء التاسع )

-٩-

جلس حامد مع صديقه اشرف على المقهى ، ملامح حامد توحي بالحزن والضيق حيث انه جلس صامتا لوقت طويل وهذا ليس من عادته فسأله اشرف : مالك يا صاحبي ؟

فرد حامد بنبرة حزينة : كنت فاكر اني لو اتجوزت حنان بنت عزت القماش هتفتحلي أبواب السعد وهتنقل نقلة تانية مكنتش احلم بيها بس اللي حصل غير كده شيلت نفسي هم فوق همي .

ضحك اشرف ثم قال باستهزاء : يا حامد انت غليان في وسط الناس دي ، انت فاكر القماش ده راجل اهبل هيجوزك بنته ويكبش ويديك .

زفر حامد بضيق ثم قال : حتي البت طالعه رمه زي ابوها كل ما اقولها خدي من ابوكي فلوس نمشي دنيتنا الواقفة تقلب وشها عليه .

فنطق اشرف مداعبا : يا عم اخلع من الجوازه دي واشتري دماغك .

فعلق حامد على حديث اشرف قائلا : لازم اطلع من الجوازه دي بأي مصلحة ، القماش ده معاه فوق الميه مليون مفيهاش حاجه لو قلبته في كام مليون .

ضحك اشرف ضحك هستري ثم قال : ده ممكن يولع فيك انت وعلتك لو مدت ايدك على مليم واحد من فلوسه .

صمت حازم صمتا طويلا فهو يفكر في طريقة يستولي بها على أموال عزت القماش .

العشق والدم ( الجزء الثامن)

-٨-

ذهبت حنان إلى فيلتها بالتجمع لتحاول ارضاء ابوها ولا تخسره إلى الأبد، قابلها عزت بفتور حيث سألها : ايه اللي جابك يا حنان ؟

فردت حنان بنبره حزينة : وحشتوني فجيت علشان اشوفكم .

نطق عزت معاتبا : انتي اللي أختارتي تتجوزي النصاب ده وتخسري ابوكي وامك ، بعتينا بالرخيص يا حنان .

تخليت ناهد عن صمتها محاوله منها لتصليح الموقف فقالت مخاطبه حامد : خلاص يا عزت في الأول والآخر دي بنتنا .

علق عزت بضيق : البت اللي تعصي ابوها علشان خاطر عيل حرامي ونصاب زي ده متستهليش تبقى بنتي .

بكيت حنان بحرقة ثم قالت : انا محتاجاك  اوي يا بابا بلاش تتخلي عني .

فرد عزت باقتضاب : انا كان ليه بنت وماتت خلاص .

نطقت ناهد بتوسل : سامحها يا عزت علشان خطري .

فصرخ فيها عزت هاتفا : اخرسي انتي ملكيش دعوة .

ثم التفت إلى ابنته حنان وقال لها : اطلع بره ومتجيش هنا تاني .

خرجت حنان من بيت أهلها مطرودة ولكنها قررت أن تحاول وتحاول حتي يرضى ابوها عنها ويسامحها على زواجها من حامد حتي ولو تعيش العمر كله على هذا الأمل .

العشق والدم (الجزء السابع)

-٧-

سافر حامد وزوجته من العجمي إلى القاهرة بعدما صرف اخر مليم في جيبه ، عاد حامد إلى شقته القديمة في المطرية ومعه زوجته حنان ليعيشا مع امه ، بيت قديم من ثلاث طوابق البيت أيل للسقوط شروخ كبيرة ممتدة في الحائط وكأنها لوحة تشكيلة لرسام مجنون ، شقة صغيرة مكونة من غرفتين وصاله صغيرة اما عن الحمام والمطبخ فمجتمعين في مكان واحد غرفة مترين في مترين ، شعرت حنان بالضيق والكأبة حينما دخلت الشقة خاصة أن ام حامد قابلتها بفتور ، اخذ حامد حنان من يدها ودخلا غرفتهما

سألته حنان بنبره جاده : ايه المقابلة اللي امك قبلتنا بيها دي ، هي مش طايقنا ولا ايه ؟

فرد حامد بهدوء : بالعكس ده حتي امي فرحانه بيكي اوي بس هي اللي شكلها كده .

صمتت حنان قليلا ثم قالت له بضيق : بس انت مقولتليش اننا هنعيش مع امك .

فنطق حامد بخبث : لو معايا فلوس كنت اجرتلك شقه .

أيقنت حنان ما يرمي اليه حامد فقالت باقتضاب : ما هو لو انت بتشتغل هيبقى معاك فلوس تجيب شقه نعيش فيها لوحدنا .

نظر لها حامد بشزر ثم قال بضيق : تصبحي علي خير .

بدأت تشعر حنان انها تسرعت في زواجها من حامد خاصة انه شخص غير مسئول يريد المال بدون عمل أو تعب وبدأت تشك في حبه لها ، اغمضت حنان عينها وحاولت النوم ولكنها لم تستطيع وظلت مستيقظة حتي الصباح .

 

العشق والدم

-٦-

وبعد مرور شهر على زواجهما استيقظت حنان من نومها فلم تجد حامد بجوارها بحثت عنه في الشقة حتي وجدته جالسا في الشرفة يدخن سيجارة ، نظرت حنان إلى الطفاية الموجودة أمامه فوق السور فوجدتها ممتلئة بأعقاب السجائر وهذا يعني انه لم يذوق طعم النوم منذ امس .

اقتربت منه حنان فوجدته شاردا ؛ حزينا ؛ ملامح وجهه توحي باليأس فالتقطت يده بحنان وسألته : مالك يا حامد ؟

فأجابها حامد قائلا : الفلوس اللي استلفتها من حسن اخويا خلصت ومش عارف هنعيش ازاي .

فعلقت حنان بجديه على كلامه فقالت : لازم تدور علي شغل مفيش حل تاني .

ابتلع حامد ريقه وسألها بضيق : هشتغل ايه وبكام ؟

فردت حنان بتفاؤل : انت معاك بكالوريوس تجاره اشتغل محاسب او سيلز وربنا هيكرمنا بس نعمل اللي علينا الأول .

ضحك حامد ثم قال باستهزاء : محدش في البلد دي بيشتغل اللي هو عايزه !

فقالت حنان بحده : مينفعش انك تفضل قاعد من غير شغل خصوصا انك بقيت متجوز وفاتح بيت .

فقال حامد ببجاحه : طب ما تخلي بابا يساعدنا لحد ما ربنا يكرمني والاقي شغل .

نطقت حنان بحده : والله انا متجوزه راجل مش هينفع اقوله اصرف عليه وعلى جوزي .

ثم تركته وانصرفت غاضبه اما حامد فشعر بالضيق لأنه تسرع في فتح هذا الموضوع معها فقرر ان لا يفتحه مره اخري حتي تأتي الفرصة المناسبة .

العشق والدم

-٥-

جلس عزت القماش أمام حمام السباحة بفيلاته بالتجمع شاردا ؛ حزينا ؛ منطويا اقتربت منه زوجته ناهد حتي وقفت بجواره ولكنه لم يشعر بها وكأنه يعيش في عالم آخر غير هذا العالم الذي يعيش فيه باقي البشر ، ربتت ناهد على كتفه فالتفت إليها قائلا : في حاجه يا ناهد ؟

فسألته ناهد باستغراب : مالك يا عزت انا عمري ما شوفتك بالشكل ده ؟

فرد عزت بنبرة حزينة : خايف على حنان اوي .

زفرت ناهد بضيق ثم سألته : ما دام انت بتخاف عليها وبتحبها اوي كده طردتها من الفيلا ليه ؟

أشعل عزت سيجارة الضخم ثم قال بنبرة فيلسوف : بنتك الغشاوة علي عينها ومش هتشوف الحقيقة كاملة غير لما تعرف حامد على حقيقته .....

فقاطعته ناهد مستفسرة : انا مش فاهمة حاجه !

زفر عزت دخان سيجارة في الهواء ثم قال بهدوء : حامد عيل حرامي ونصاب ضحك علي بنتك بأسطوانة الحب والعشق وده طبعا علشان ياخد فلوسها ، بنتك لما أصرت تجوزه غصب عني حرمتها من كل حاجة فراحتله بشنطة هدومها ، كلها مسألة ايام ويبان على حقيقته وساعتها هي هتفهم انا عملت كده ليه .

صمتت ناهد قليلا ثم سألته : قدر طلع بيحبها بجد وكمل معها وهي فقيرة .

ابتسم عزت بخبث ثم قال : ساعتها هعرف انه يستحقها وهعتبره زي ابني وهجبهم يعيشوا معانا في القصر .

ثم سحب نفسا من سيجارة واردف قائلا : بس للأسف مش ده اللي هيحصل وبكره هتشوفي .

انصرفت ناهد من أمامه اما هو فعاد كما كان شاردا ؛ حزينا ؛ منطويا كل تفكيره ينحصر في ابنته حنان .

 

 

 

 

 

 

 

 

العشق والدم

-٤-
استأجر حامد شقة صغيرة في العجمي استديو عبارة عن غرفة صغيرة وصالة ضيقة  حمام ومطبخ أمريكي وبالرغم من كل هذا فرحت حنان بالشقة وكأنها قصر كبير حيث قالت : الشقة جميلة اوي يا حامد .
نطق حامد بنبرة حزينة : انا عارف ان الشقة صغيرة اوي وفي منطقة شعبية متليقش بيكي بس العين بصيرة والايد قصيرة .
التقطت حنان يد حامد وقبلتها ثم قالت : انا لو عيشت معاك في عشة هتبقى بالنسبالي قصر .
ابتسم حامد ثم قال لها : المطبخ عندك يا عروسة نفسي ادوق الأكل من ايدك .
ضحكت حنان ثم قالت مداعبة : بس انا مبعرفش اطبخ اتصل لنا بالدليفري .
اشتاط غيظ حامد ولكنه كتم ضيقه بداخله ثم قال بعدم اكتراث : مش مهم .
ثم دخل الغرفة لينام بعد عناء سفر طويل بالقطار وبعد أكثر من ساعتين دخلت حنان الغرفة لأيقاظة من النوم حيث ناديت عليه بصوتها الرقيق : اصحي يا حبيبي الاكل جاهز .
فتح حامد عينه بتكاسل ثم سألها بنبرة يغلبها النعاس : الدليفري جه ؟
ضحكت حنان ثم قالت بسخرية : اه جه يا حبيبي وعايز ٢٠٠ جنية تمن الاكل .
قفز حامد من فوق الفراش ثم قال بضيق : حرام عليكي يا حنان تشتري اكل ب٢٠٠ جنية علشان طقه واحده .
ثم سألها باستغراب : امال باقي الشهر هنعمل ايه ؟
ضحكت حنان ضحك هستري وكأنها تشاهد مسرحية كوميدية لأول مره ، خرج حامد من غرفته مهرولا ليجد مائدة كاملة لا ينقصها شيء بحث بعينه عن الدليفري فلم يجده التفتت ليسألها ولكنها سبقته في السؤال حيث قالت : انت تصدق بردو ان حنان مراتك مبتعرفش تطبخ !
ضحك حامد واحتضنها بقوة ثم قال : ربنا ميحرمنيش منك يا حبيبتي .
وهكذا نجحت حنان من تحويل بيتها الصغير إلى جنة صغيرة تكفيها هي وحامد ولا ينقصهما فبها شيئا .

نلتقي غدا مع جزء جديد من #العشق_والدم

العشق والدم

#العشق_والدم
-٣-
جلست حنان بجوار النافذة شاردة ؛ حزينة لا يغمض لها جفن بعكس حامد الذي غاط في ثبات عميق اول ما ركب القطار ، تذكرت حنان الحوار الذي دار بينها وبين ابوها عزت القماش وكأنه شريط مسجل واعادت تشغيله حيث كان القماش جالسا على مكتبة بفيلا التجمع منشغلا بقراءة أوراق هامة دخلت علية حنان المكتب دون استئذان فنظر لها بعتاب ثم سألها : من امتي بتخشي علية المكتب من غير ما تستأذني ؟
فردت حنان بخجل : اسفة يا بابا بس في موضوع مهم عايزه اكلم حضرتك فيه ؟
استشف القماش الموضوع بخبرة رجل تخطي الخمسين عاما بالإضافة إلى انه رجل عصامي بدأ من الصفر حتي أصبح صاحب أكبر سلسة مطاعم في مصر والوطن العربي فسألها بهدوء : اوعي تكوني عايزه تكلمني بخصوص النصاب اللي اسمه حامد ؟
فردت حنان مدافعه عنه حيث قالت : يا بابا حامد مش نصاب ده انسان مكافح وبيحبني وانا كمان بحبه .
ضحك القماش ثم قال باستهزاء : المكافح بتاعك بقالة سنتين مبيشتغلش ده غير أنه مبيعملش حاجه في حياته غير أنه بيشرب حشيش .
علقت حنان علي حديث ابوها فقالت : ضغوط الحياة وظروف البلد اللي زي الزفت هي اللي خليت حامد وشباب زيه كتير يشربوا مخدرات .
نطق حامد بثقه : كل واحد يعمل حاجة غلط في البلد دي يقولك ظروف البلد هي البلد هي اللي هشتغل الناس وتبني مستقبلهم امال هما هيعملوا ايه ؟
انا قدامك اهو بدأت من مفيش كنت شغال على عربية كبده وسجق في الشارع النهارده بفضل ربنا عندي أكبر سلسلة مطاعم ، ظروف البلد دي الشماعة اللي الشباب الفاشلة بتعلق عليها اخطاءها .......
قاطعته حنان فقالت : حامد مش فاشل يا بابا وبكره هيبقى احسن من كل اللي حواليه وذي ما انت كبرت وبقيت رجل أعمال هو كمان هيكبر ويبقى ممثل مشهور بس تجيله الفرصة .
نطق القماش باستنكار: الإنسان الناجح هو اللي بيعمل الفرصة مش بيستنها .
زفرت حنان بضيق ثم قالت بجرأة : انا هتجوز حامد يا بابا حتي لو انت رفضت .
تجمدت ملامح القماش ثم قال بنبرة تهديد : لو اتجوزتي حامد يبقى انت لا بنتي ولا اعرفك والبيت ده متعتبهوش ومش هصرف عليكي جنية من النهارده .
نطقت حنان بدون تفكير : بردو هتجوزه وهسافر معاه ونسيبلك البلد كلها .
فحذرها القماش للمرة الأخيرة فقال : لو اتجوزته يا حنان مش هتعتبي البيت ده تاني
فردت حنان بنبره حاده : وانا موافقه يا بابا .
اخذت حنان حقيبتها وتركت الفيلا بلا رجعة لتبدا حياة جديدة مع الشخص الذي تحبه مع حامد .
نلتقي غدا مع جزء جديد من #العشق_والدم

العشق والدم( الجزء الثاني )

#العشق_والدم
-٢-
وقف حامد منتظرها أمام محطة القطار في يده تذكرتين ، تأخرت عليه حنان أكثر من نصف ساعة ، حاول الاتصال بها ولكن في كل مرة هاتفها مغلق ، سيطر الخوف والقلق على حامد لدرجة انه فكر أن يذهب إليها ليطمئن عليها ، احس بأن هناك مكروه حدث لها عشرات السيناريوهات خلقها عقله الباطن كلهم نهايتهم واحده وهو أن حنان لن تأتي ابدا ، وقف حامد منتظرها حتي وصل القطار إلى المحطة تمني حامد من قلبة أن تأتي حنان ليستقلا القطار المسافر إلى اسكندرية وبالفعل حقق الله امنيته أتت حنان في اللحظة الأخيرة بعدما يأس حامد من مجيئها ، اول ما راءها حامد ركض تجاها احتضنها بقوة ثم قال بنبرة دافئة : وحشتني يا حنان .
فنطقت حنان بلهفه : بحبك يا حامد اكتر من نفسي .
ابتسم حامد وقال : كنت خايف متجيش وأفضل عمري كله مستنيكي .
فعلقت حنان قائلة : انا واجهت ابويا بالحقيقة قولتله اننا بنحب بعض وأننا هنتجوز وهنسافر بعيد ......
وضع حامد يده على فمها وقال : مش وقته خلينا نعيش حياتنا زي ما احنا عايزين .
استقلا العاشقان القطار ليبدأ سويا حياة جديده من اسكندرية حياة بعيده عن عزت القماش حالمين بحياة سعيدة حالمين بالجنة المفقودة .
نلتقي غدا مع جزء جديد من #العشق_والدم

العشق والدم

-١-
وقف حامد أمام كورنيش النيل أشعل سيجارة نفث دخانها بتوتر نظر في ساعة يده كل عشرة ثواني حتي أتت حبيبته حنان ، التقط حامد يدها وقبلها ثم احتضن يدها بكف يده الخشن  وساروا سويا على الكورنيش نطقت حنان بنبرة حزينة : بابا مش موافق على جوازنا .
رد حامد بياس : كنت عارف انه هيرفض يجوزك ليه .
تساقطت الدموع على وجنتيها رغما عنها ثم قالت بنبرة صادقة : انا بحبك يا حامد ومقدرش اعيش من غيرك .
رد حامد بجرأة : يبقى لازم نتجوز ويحصل اللي يحصل .
فسألته حنان باندهاش : طب ازاي وابويا رافض الفكرة من الأساس ؟
فنطق حامد بنبره جاده : نهرب ونحطه قدام الأمر الواقع .
ردت حنان بياس : مش هيسبنا في حالنا ده ابويا وانا عارفه .
نطق حامد بعصبية : ابوكي مش هيتحكم في مصيرنا .
فهزت حنان رأسها مقتنعة بكلامه ثم قالت باستسلام : انا موافقه اننا نهرب ونتجوز
وفي النهاية اتفقا العاشقان على الهروب والزواج ليتركا عزت القماش أمام الأمر الواقع .

اللحظات الأخيرة

الشخصيات :

·       عزت : الاب رجل مسن في العقد السابع ، ثري وبخيل ، مريض منذ سنوات طويله لا يفارق الفراش .

·       يحي : الابن الاكبر في العقد الرابع ، طماع واناني لا يفكر الا في مصلحته الشخصية حتى ولو على حساب الآخرين.

·       ياسين : الابن الأوسط في منتصف الثلاثينات ، مستهتر وهلاس ، لا يتحمل مسئوليه ، مبدأه في الحياة البحث عن المتعة اللحظية .

·       يارا : الفتاه الوحيدة اصغر أخواتها لم تتعدى الثلاثين عام ، شخصيه اجتماعيه ، تحب الحياة ، وتحلم بجمع الشمل .

·       طلعت : طبيب وصديق الاب ، في العقد السادس ، شخص طيب ، ملامحه هادئة ، أكثرهم تعاطفا بالأب .

المكان :

فيلا عزت ، اثاثها عتيق ، واضح عليها الاهمال وقله النظافة .

المشهد ١                                                                     ليل / داخلي

غرفة النوم

عزت ممدد على الفراش حالته الصحية سيئة للغاية ، يقضي لحظاته الأخيرة ، يارا وطلعت يقفان جواره ، عيناهما لا تفارقاه .

طلعت :

خلاص يا يارا بقيت مسألة ساعات مش اكتر .

يارا تبكي بحرقة لوداع أبوها ، طلعت يربت على كتفها

طلعت :

عزت لو مات هيرتاح ، سنين طويله والمرض بياكل في جسمه .

يارا :

انا عارفه ان بابا اتعذب كتير ، بس برده وجوده فارق معايا ده ضهري اللي بتسند عليه .

طلعت :

خساره .

يارا تتسأل :

خساره ليه يا دكتور ؟

طلعت :

انتى ملاك وسط شياطين .

يخرجا من الغرفة تاركين عزت وحيدا بين أيدي المولى

المشهد ٢                                                                     ليل / داخلي

الصالون

يجلس الشقيقان في الصالون المذهب العتيق ينتظران نبأ موت الاب بفارغ الصبر ، يخرج لهما الطبيب من حجره عزت وبجواره يارا ملامحها توحي بالحزن والأسى

يحي يستفسر :

ايه الاخبار يا دكتور ؟

طلعت بضيق :

كلها ساعات وترتاحوا منه خالص .

ياسين بسعادة محاولا اخفاءها :

بجد بابا هيموت خلاص .

نظر له طلعت بشزر وكذلك يارا

طلعت ليارا :

لما عزت يقابل وجه كريم اتصلي بيه علشان اخلص لكم إجراءات الدفنه .

يارا تهز رأسها بحزن  

طلعت :

السلام عليكم .

ينصرف الطيب ، ويجلس الأخوة مع بعضهم

يحي :

اول ما عزت يموت نخلص حوار اعلان الوراثة ده اهم حاجه .

 ياسين ليحي :

تفتكر عزت حاطط فلوس قد ايه في البنوك ؟

يحي :

مش اقل من عشره مليون .

يارا تقاطعهم بحده :

انتوا في ايه ولا في ايه ! بدل متفكروا تقعدوا حوالين ابوكم الكام ساعه اللي فاضله في عمره بتوزعوا فلوسه وهو حي .

يحي ليارا :

يعني لو قعدنا معاه هيحس بحاجه ده مبيفوقش من الغيبوبة .

ياسين ليارا :

بابا طول عمره بخيل معاه ملايين مكنزها ذي ما يكون فاكر انه هياخدها معاه القبر.

يارا بغضب :

اللي انتوا بتتكلموا عليه ده ابوكم ، حتي لو كان بخيل شويه لازم تحبوا وتخافوا عليه .

يحي ليارا بسخرية :

مين ده اللي نحبه ونخاف عليه ، ابوكي كان شايفني بستلف من طوب الارض ورفض يساعدني ويقف جنبي مع أنه معاه اللي يعيشنا ملوك طول عمرنا .

ياسين ليارا :

انا عمري مطلبت منه فلوس واداني ، كل مره اجيله فيها يشتمني ويطردني من البيت .

يارا لياسين :

بابا مبيرضاش يديك فلوس علشان عارف انك هتصرفها على المخدرات والستات .

ياسين ليارا يدافع عن نفسه :

وايه المشكلة ابويا مليونير ، كل الأغنيا عايشين حياتهم بالطول والعرض .

يحي ليارا مستفسرا :

طب وانا مشكلتي ايه ؟

تصمت يارا لا تريد الدخول في أحاديث جانبيه لن تجزي بشيء

يحي مرادفا :

انا واحد بحب اعتمد على نفسي عايز اعمل حاجه لنفسي ولعيالي ، كل ما أفكر في فكره مشروع واطلب منه يساعدني يرفض ويقولي انت بني ادم فاشل ، واضطر في الاخر اني استلف من اللي يسوى واللي ميسواش .

يارا بحده :

بابا شقي بالفلوس دي بدأ من الصفر لحد ما بقى مليونير ، وعارف انه لو اداهالك هتضيعها على مشاريعك الفشلة ، والدليل على كلامي أن كل المشاريع اللي دخلتها خسرت فيها كل فلوسك واترفع عليك قواضي وخدت احكام ولا انت نسيت الكمبيالات ووصلات الأمانة .

صمت الشقيقان وظل ينظرا لبعضهما

يارا :

جايز يكون بابا ظلمكم بسبب بخله ، بس هو كان عايزكم تعتمدوا على نفسيكم وتعرفوا قيمه الجنيه .

يحي ليارا بغضب :

تقدري تقوليلي الفلوس عملت له ايه وهو مرمي الرمية دي ، فضل يحوش ويكنز حرم نفسه وحرمنا معاه من متع الدنيا ، اديه في الاخر هيسيب كل حاجه ويمشي .

ياسين ليارا :

بخله حول حياتنا لكابوس ، خلانا نكرهوا ونكره بعضنا .

يارا :

الظاهر الكلام معاكم مش هيجيب نتيجة انا دخله اقعد معاه الوقت اللي فضله في الدنيا ، حد فيكم هيجي معايا .

الشقيقان ينظران لبعضهما وفي النهاية يتسمرا مكانها ، يارا تتركها لتدخل غرفه أبوها.