يوميات عويس الحلقة الثالثة عشر

# يوميات عويس ١٣
استيقظ عويس من النوم مفزوعا على صوت طرقات عنيفة على باب البيت فخطى خطوات ثقيلة ومهزوزة حتى وصل الى الباب ليجد مصر كلها تقف خلفه
البقال : فين فلوسي يا عويس !
الزبال : ٦ شهور متأخرين عليك يا مفتري .
الصيدلي : ده انت بتبلع البرشام ذي ما تكون بتأذاذ لب !
صاحب البيت : فين ايجار الشقة يا نصاب بقالك ٨ شهور قاعد بلوشي .
عويس : الصبر مفتاح الفرج والعجلة من الشيطان .
الصيدلي : الهي عجلة تخبطك تجيب اجلك ونرتاح منك .
عويس : طب انا لما اموت مين هيديكوا فلوسكم .
البقال : الواحد مش عارف يقول عليك ايه رخم وانت عايش وارخم وانت ميت !
الزبال : احنا لازم ناخد حقنا بالدراع نضربه علقة موت ونعلقه ع باب البيت لحد ما يبان له صاحب .
عويس : حتى ولو ضربتوني مش هينوبكم غير وجع ايديكم ، الضرب مش هيرجع فلوسكم .
صاحب البيت : احنا نبلغ عليه الحكومة ، واهو يتحبس ونخلص من طلعته البهية .
عويس : يا ريت اتحبس ع الاقل يبقى الواحد ضمن اكله ونومه ببلاش وبرضه فلوسكم مش هترجع .
الصيدلي : طب اخد حقي منك اذاي !
الزبال : عايز فلوسي يا حرامي !
البقال : انت جنس ملتك ايه !
صاحب البيت : اكيد حلوف .
عويس : انا رأي انكم تنسوا حوار الفلوس اللي ليكم ونبدأ صفحه جديده .
انصرف الجميع تاركين عويس بمفرده بعدما إصابتهم حاله من الذهول .